تقييم لمقهى وميني ماركت دافينشي Davinchy الموجود على طريق مصر إسكندرية الزراعي.. وعرض للمنيو الخاص بيه، وإزاي ممكن توصل له لو حبيت ترتاح وانت مسافر

دافينشي | مقهى وميني ماركت ترتاح فيه على الطريق الزراعي

 

دافينشي - Mini Market and Cafe

ميني ماركت على طريق مصر - إسكندرية الزراعي

الكلام هنا عشان اللي بيسافروا يوميا من محافظات الوجه البحري للقاهرة؛ والعكس..

صادفنا مكان لطيف جدا موجود على طريق مصر – إسكندرية الزراعي، وبالتحديد في محافظة المنوفية، ما بين مدينة بركة السبع ومدينة قويسنا، في الاتجاه اللي رايح القاهرة..

دافينشي Davinchy... دة اسم المكان أو المقهى، أو الميني ماركت اللي هنتكلم عنه..

اقرأ أيضا: طريقة إعداد الاسبريسو أفوجاتو

 

كافيه وميني ماركت وسط الخضرة

دافنشي مشروع سوبر ماركت صغير، مع بار شامل لكل أنواع المشروبات والحلويات اللي بتحبوها..

أخدنا راحة من سفرنا لوقت قصير في المكان دة..

القعدة حلوة جدا، والجو دايما بيكون لطيف..

مساحات الأراضي الخضرا المزروعة حوالينا من كل الاتجاهات؛ لأنهم عاملين قعدات برة في الهوا، والقعدات اللي جوة الميني ماركت أو الكافيه لطيفة بردو لأن المكان مُكيَّف.. واضح إنهم عارفين كويس معنى تعبير "مقهى مريح للأعصاب"..

كان واضح إن المكان دة معروف على مستوى المناطق القريبة منه؛ لأننا لاحظنا عدد كبير من الشباب اللي راكنين عربياتهم وبيشربوا عربياتهم فيها وحواليها..

اقرأ أيضا: ماهي قهوة الفلات وايت Flat White؟! وكيف يمكن تحضيرها؟!

 

ليوناردو دافينشي

سألنا عن سبب تسمية المكان (دافينشي)؛ وكان الرد إن أصحابه سمُّوه على اسم النحات والرسام الإيطالي المعروف "ليوناردو دافينشي"؛ صاحب لوحة الموناليزا الشهيرة، واللي بيحاولوا يربطوا بين أعمال "دافينشي" المرسومة، وبين الجهاز اللي عندهم، ويقدر يرسم صورتك على قهوتك أو الكابتشينو أو اللاتيه أو الفلات وايت اللي بتحبهم..

منيو شامل

دافينشي Davinchy بيقدم منيو كبير من المشروبات الباردة والساخنة والحلويات Desserts والكوكتيلات.. منيو مميز جدا جدا، وشامل لأصناف كتير..

طلبنا ماكياتو Macchiato واسبريسو...

الطلب خلص في وقت قياسي، رغم الزحمة.. ولاحظنا إنهم بيشتغلوا بقهوة اسبريسو لافازا Lavazza الغنية عن التعريف..

الماكياتو والاسبريسو مش عايزين باريستا عنده خبرة كبيرة أوي... بس إحنا شوفناه بيعمل كوكتيلات لعملاء تانيين... واضح إنه مُتَمكِّن، وعارف كويس بيعمل إيه..

للأسف مقدرناش نجرب حاجة تانية، بس قريب أوي هيكون لينا زيارة تانية في المكان اللطيف دة اللي بيبيع حلويات وشوكولاتات وبسكويتات مختلفة ومستوردة مع القهوة والمشروبات التانية...

الأسعار طبيعية جدا ومش Over، ومناسبة لكل الناس..

اقرأ أيضا: كيفية إعداد قوائم المشروبات والمأكولات في المقاهي والمطاعم

 

ودة المنيو بتاعهم من الصفحة الرسمية للكافيه والميني ماركت:

منيو دافينشي 1

منيو دافينشي 2

منيو دافينشي 3

منيو دافينشي 4

عرفنا إن دافينشي Davinchy له فرع تاني في مدينة طنطا في شارع الاستاد.. دافينشي طنطا هو الفرع رقم 1 من سلسلة الفروع اللي بنعتقد إنها هتستمر بإذن الله..

أول سيلفي كافيه في مصر

 

دافينشي -  Mini Market and Cafe

دافينشي بيعرّف نفسه بإنه أول سيلفي كافيه في مصر على حسب صفحته الرسمية على فيسبوك... كافيه بيرسم صورتك على قهوتك..

ادخل هنا شوف الصفحة الرسمية لكافيه وميني ماركت دافينشي Davinchy

الحاجة الوحيدة اللي أخدناها على المكان؛ كلمة Davinchy... الكلمة بتتكتب كدة Da Vinci.. بس دة ميفرقش كتير مع الضيافة الممتازة، والمشروبات عالية الجودة.. والرغبة في صياغة علامة تجارية تستمر.. ودة اللي حاصل تقريبا..

أي حد مسافر على طريق مصر – اسكندرية الزراعي.. ممكن تعيش التجربة دي.. منها ترتاح شوية من الطريق الطويل؛ ومنها تستمتع بالقهوة والجو اللطيف..

 اقرأ أيضا: مقدمة عن الضيافة - Hospitality

 

المكان كان اسمه On The Way قبل ما يتجدد... ودة موقعه على Google Maps